فيليبس وشعارها البساطة من أجل حياة أسهل ج2

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-05

مشاهدات :

2502

شارك المقال

اتكلمنا في مقال سابق عن المشكلات اللى واجهت شركة فيليبس وازاى منتجاتها كانت صعبة الاستخدام من قبل العملاء بسبب التكنولوجيا الكبيرة المستخدمة فيها وان السبب ده هو اللى دفعها انها تعمل اعادة رسم للصورة الذهنية أو ما يعرف فى علم التسويق بال "Repositioning "

هنكمل النهاردة باقى المشكلات التسويقية اللى واجهتها فيليبس وازاى قدرت إنها تحلها ( المشكلات دى اتحددت عن طريق أبحاث السوق ) ومن المشكلات دى هى الاستثمار فى الإعلانات فى سنة 2003 .. المشكلة ان فيليبس كان عندها تنوع كبير فى المنتجات لكنها مكانتش مركزة على منتج معين فى التخطيط لحملة الإعلانات وانها بتخاطب أكتر من شريحة فى وقت واحد وبدون تركيز على شريحة معين مع تعدد أسماء المنتجات .. النتيجة كانت ان حالة عدم التركيز دى اتنقلت للعملاء وبقوا هما كمان مش مركزين فى استقبال رسالة فيليبس .. التحدى كان وضع رؤية محددة تقدر من خلالها إنها تعيد رسم الصورة الذهنية بالشكل المناسب واللى بيمثله شعار الشركة "sense and simplicity" .

إعادة رسم الصورة الذهنية ده كان أحد أهداف فيليبس لكن مش بس للعملاء .. لأ كمان لكل الموظفين والعاملين وشبكة الموردين .. والمساهمين .. مهم إن كل طرف بيتعامل مع الكيان ده انه يشوف رؤية الشركة ويعمل بيها ومن خلالها .. لو كل واحد فى شركة أو منظمة كبيرة عرف طبيعة دوره واختصاصاته وان تنفيذ الدور ده على أكمل وجه بيساعد الشركة فى تحقيق أهدافها من خلال رؤية واضحة شركاتنا هتتنقل نقلة كبيرة وهتحقق أهدافها وهتنجح .

بدأت فيليبس فى تنفيذ التوجه الجديد وظهر من خلال منتجاتها الجديدة 3 عناصر أساسية وهى منتجات بتتميز بقمة التقدم التكنولوجى بالإضافة إنها مهتمة بتلبية احتياجات العميل ومساعدته انه يعيش حياته بشكل أسهل وانه مش هيلاقى صعوبة فى استخدامها وأصبحت كل منتجات الشركة بتمثل الإتجاه ده بالإضافة للتركيز على منتجات محددة بتخاطب شريحة معينة .

فيليبس بدأت تركز على تحقيق رؤية محددة وبالتالى بدأت تركز فى اعلاناتها على توصيل معنى " sense and simplicity"  وظهر ده فى أحد منتجاتها وهو Senseo .. Senseo ده عبارة عن ماكينة قهوة اتصممت بشكل مميز ومزودة بتكنولوجيا يقدر العميل يستخدمها بسهولة وبتنتج قهوة بطعم مميز جداً .. فى خلال 4 سنين من 2001 ل 2005 تم انتاج 10 مليون وحدة من ماكينة القهوة دى فى 8 دول ده غير منتجات تانية زى Chameleon وهى لمبة إضاءة بتغير لونها لأى لون يتعرض قدامها .. "intouch" وهى عبارة عن مرايا يقدر أى مستخدم انه يسيب رسالة عليها لأى حد فى البيت بدل ما تكتب ورق أو تلزق رسالة على التلاجة

أنتجت كمان منتج اسمه "Momento" وهو عبارة عن مشغل فيديو على شكل كرة ويقدر المستخدم من خلالها بستجيل أفضل اللحظات والذكريات الشخصية .. ده غير كمان انتاج منتجات طبية بتتمتع بتكنولوجيا متقدمة جدًا

دى كانت مشكلات فيليبس التسويقية .. مهتمين نعرف منكم ايه اللى استفدتوه من دراسة الحالة دى وايه تقدروا تنفذوه فى البيزنس بتاعكم أو مشروعاتكم وربنا يوفقكم جميعاً

تسويق