علمتنى الصيدلية

قراءة المقال باللغة الفصحى

الكاتب :

اعمل بيزنس

تاريخ النشر :

2016-12-31

مشاهدات :

2155

شارك المقال

كلنا بنتعود نشترى احتياجاتنا من أقرب الاماكن لينا لسهولة الوصول ليها فى أى وقت لكن لما بتروح تسكن فى مكان جديد أكيد بتبدأ تدور على محلات تانية تبدأ تتعامل معاها بس ساعات كده فى بعض الاماكن مش بتغيرها حتى لو سكنت فى مكان تانى أبعد .. بتفضل تروحلها وتتعامل معاها مرة واتنين طول عمرك بسبب المعاملة والجودة والخدمة الممتازة

ده اللى عملته أحد الصيدليات مع العملاء بتوعها لأن عندها أكتر من ميزة اتفوقت بيها على منافسينها واللى خليتها تحتفظ بعملائها حتى لو من اماكن بعيدة جغرافيا عنها رغم وجود منافسين اقرب

المميزات دى ممكن ياخدها أى صاحب صيدلية وبرضه ممكن ياخدها أى صاحب مشروع عايز يحتفظ بعملاؤه وفيها حاجات ممكن تشوفها إنها بتخسر الصيدلية على المدى القريب لكن على مستوى البعيد هى بتكسبه جدًا دون الصرف على دعايا أو خلافه ....

1- فريق عمل كفء ومتعاون إلى حد كبير وعدده كبير لتلبية ساعات الذروة وثابت يعنى خلال 10 سنوات من التعامل فيه اتغير مرتين فقط .

2- طاقم العمل بيقوم بخدمات كتير مثل قياس الضغط أو إعطاء حقنة سواء فى الصيدلية أو فى المنزل مجانًا.

3- متوفر أى نوع دواء إنت محتاجه ولو غير متوفر بياخد الأوردر وبعدين يوفرهولك

4-تخزين بيانات العملاء على الكمبيوتر وبيديلك رقم خاص ولو غيرت عنوانك بيغيره على الكمبيوتر ودى ميزتها إنك مش كل مرة تتصل تعد تشرح وتوصف وتتصل بالراجل اللى بيوصلك الطلبية 10 مرات .

5- من ضمن برضه ميزة الكمبيوتر إن اللى بياخد منك الأوردر بيبقى شايف أوردراتك اللي قبل كده فبيسهل عليك أسماء الدوا ومبيحصلش لخبطه بين اسم واسم .

6- السلاسة وعدم المناقشة فى التبديل أو الإرتجاع يعنى طالما الدوا متفتحش يسألك عايز فلوسه كاش ولا هاتاخد بيها حاجة ؟ من غير تحقيق ولا خدته ليه من الأول والكلام الكتير ده .

7- عدم إضافة تمن للتوصيل على الفاتورة وانت وذوقك مع اللى بيوصلك ... غالبًا بتلاقى كل اللى بيوصلوا بيحطوا فلوس على الفاتورة وبرضه لازم تدى اللى بيوصلك فلوس .

8- الراجل اللى بيوصلك بيبقى ذوق وجايبلك الباقى كامل وفكة من غير ماتطلب (حاجات بسيطة بس ساعات بتنرفز أى عميل ) .

9-الصيدلية فاتحة 24 ساعة بجميع خدماتها ( تقريبًا ) .

10 – الاستمرارية طول ال 10 سنوات بنفس المستوى فى كل ما سبق .

 

لو فكرت شوية فى النقط اللى فوق هتلاقى معظم الخدمات بسيطة ومعتمدة على اهتمام صاحب الصيدلية بتعيين فريق عمل كفء وتدريبه وتوصيل له رسالة مهمة وهى التعامل مع العملاء بقدر كبير من الحرص والرعاية والإهتمام .
ولو فكرت فى منتجك أيا كان نوعه هتلاقيك هتكسب كتير جدًا لو ركزت مع فريق عملك وعلمتهم المبادئ البسيطة دى ...وربنا يوفق أى صاحب عمل يهتم بموظفيه وعملاؤه

 

تسويق