SWOT analysis

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-05

مشاهدات :

2783

شارك المقال

اتكلمنا فى مقال اخر عن ال "swot analysis" اللى لازم أعمله ووضحنا البيئة الداخلية والمنافسين ووضحنا انه تحليل لنقط القوة والضعف والتهديدات اللى ممكن تقابلنى فى التسويق للبيزنس بتاعى وايه الفرص اللى ممكن أستغلها ..

هنتكلم النهاردة عن مثال عملى لشركة "تويوتا" عملاق صناعة السيارات اليابانى وهنشوف إزاى عملت ال "swot analysis" على منتجاتها وحللت كل خطوة بالتفصيل ..

أول نقطة فى تحليل "swot" كانت دراسة نقط القوة الموجودة عند شركة "تويوتا" إنها استثمرت فى انشاء مصانع جديدة ليها فى أمريكا والصين والنتيجة هو ارتفاع نسبة الأرباح فى سنة 2005 على الرغم من إن اتجاه صناعة السيارات فى العالم فى التوقيت ده كان فى هبوط وكانت صافى الأرباح يقدر تقريبا ب11 مليار دولار وارتفاع نسبة المبيعات عشان توصل ل7.3% وحلل الخبراء الاقتصاديين النمو ده وأرجعوا النتايج دى ان "تويوتا" نجحت فى استخدام المزيج التسويق فى الأسواق اللى متواجدة فيها بشكل ناجح جداً.

بالنسبة للفرص ان "تويوتا" عندها عربيات هجينة أو الهايبيرد ( موتور كهرباء وبنزين ) ومتواجدة فى الشريحة دى من خلال موديل "لكزس RX 400h" و"تويوتا بيريوس" وهما عربيات صديقة للبيئة واللى كل ما سعر البنزين بيزيد بيكون فى صالح العربيات الهجينة دى وتقدر كمان تبيع التكنولوجيا المستخدمة فى صناعة النوع ده من العربيات للشركات التانية زى ما عملت مع شركة فورد الأمريكية ده غير كمان استهدافها لشريحة الشباب فى المدن بموديل مخصص ليهم وهو "تويوتا أيجو" .

أكبر تهديد بيواجه شركة "تويوتا" هو استدعاء السيارات اللى فيها مشاكل وده حصل معاها أكتر من مرة وكفاية نعرف ان فى 2005 تم استدعاء 88000 عربية من مختلف الموديلات عشان مشاكل فى نظام التعليق بتاعها والعربيات دى كانت متباعة فعلاً فى أمريكا وأستراليا وأوروبا واليابان والتكلفة كانت كبيرة جداً عشان يصلحوا العيوب دى ده غير التهديدات من المنافسة اليومية من كبار المصنعين فى العالم زى الشركات الأمريكية والأوروبية ده غير ظهور شركات من كوريا الجنوبية والصين كمان بالإضافة لتهديدات اقتصادية زى ارتفاع أسعار المواد الخام وتهديدات عدم استقرار الوضع الإقتصادى فى أوروبا وأمريكا .

أما نقط الضعف اللى موجودة فى شركة "تويوتا" العالمية هو ارتفاع تكلفة الأصول الثابتة بشكل كبير جداً وده بيخليها تنتج بشكل مستمر للحفاظ على الكفاءة التشغيلية لأنه اسثمار كبير ده غير كمان ارتفاع تكلفة التدريب والتطوير للعاملين .. لو اتجاه صناعة السيارات كان فى "النازل" فى العالم كله ده معناه تأثير سلبى وتكاليف كبيرة وباهظة على الشركة .. ولو الاتجاه العالمى فى صناعة السيارات "صاعد" معناه ان فى فرص بيع محتملة بتضيع على الشركة بسبب القدرة المحدودة على استيعاب حجم الطلب الكبير ودى مشكلة بيواجهها أكبر مصنعى السيارت فى العالم .

نتمنى اننا نكون قدرنا نوضح ال "swot analysis" الخاص بشركة "تويوتا" بشكل مبسط وسهل وربنا يوفق الجميع

تسويق