مبدأ استثماري - تأجير مقر الشركه ولا إمتلاكه ؟؟؟

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-05

مشاهدات :

1442

شارك المقال

طبعا التأجير هو الحل الأفضل لماذا ؟؟

1 - فيه حاجه في البيزنيس اسمها رأس المال العامل Working Capital اللي هو فيه بعض الكتب بتسميه الأصول المتداوله واللي هو مجموع الأموال السايله والبضاعه والأموال تحت التحصيل وده غير الأصول الثابته وهي الأراضي أو العقارات والسندات....إلخ

- كل ماكان رأس المال العامل أكبر كل ما كان ده في مصلحة الشركه بمعني لو رأس مال الشركه مثلا 2 مليون جنيه وهي بتحقق 20% علي رأس المال العامل فطبعا لو أنا اشتغلت بالاتنين مليون ج كرأس مال عامل مع تأجير المقر هاحقق 400 ألف ج أرباح وهادفع منهم 60 ألف ج إيجار المقر يبقي صافي أرباحي 340 ألف ج .....إنما لو تملكت المقر هاكسب 200 ألف ج فقط وابقي ضيعت علي نفسي 140 ألف ج

- برضه علماء الإدارة بيحبو إن رأس المال العامل أكبر علشان القرش صياد وفي كتب الإدارة بيقولوا عليها Cash is the king بمعني إنك حتي لو مشغلتش المليون التانيه وخليتها في البنك علشان لو جت قدامك فرصه ممكن تحقق بيها في ضربه واحده أكتر من اللي بتحققوا بالمليون التانيه في سنين

- علماء الإدارة بيفضلوا إن رأس المال العامل كبير علشان عند تصفية الشركه لاقدر الله هاتقدر تاخد فلوسك بسرعه بينما الأصول بتحتاج وقت طويل للتصفية

2 - برضه فيه ميزه إضافيه لتأجير مقر الشركه بعيدا عن رأس المال العامل وهي إنك لو اكتشفت مشكله في المكان زي مثلا إنك تشتري مقر محترم قوي بس في الدور التاسع والأسانسير بيعطل كل يوم (حصلتلي حرفيا واضطريت أبيع المقر بنص التمن تقريبا علشان أقدر أنقل لأن البرج كله حاله وقف أو إنك تكتشف إن المكان أصبح غير مناسب للمنتج أو الخدمه اللي انت بتقدمها زي اللي فتح في المعادي مثلا قبل الثورة وكان فيها أجانب كتير ونقل معظمهم للتجمع الخامس .... أو إنك عايز تتوسع لأن نشاطك زاد .......إلخ

كل دي أسباب تخلينا ننصح أي حد بيشتغل في البيزنيس إنه يأجر مقر الشركه إلا طبعا لو فيه ظروف وأسباب أخري منطقيه تخليه يشتري إنما طبعا القاعده العلمية بتبقي علي الأغلبية

وربنا يوفقنا ونستفيد من العلم في مشاريعنا

تسويق