اكتشف عميلك

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-05

مشاهدات :

2611

شارك المقال

إيه تأثير وقف برنامج باسم يوسف على السوق أو إيه اللى عملوا وقف برنامج باسم يوسف بالنسبه للسوق ؟؟

أنا هنا عايز أقول كام نقطة مهمة .....

أولًا مفيش حد حتى حاول يحل السؤال من منظور التسويق .... كله فكر فى السياسة ....

ثانيًا الصفحة كانت ولازالت وستظل بعيدة عن أى حاجة ليها علاقة بالسياسة لأن رسالتنا هى تعليم الناس الإدارة .

ثالثًا نصيحة بقى لكل اللى شغالين فى البيزنس ... حاول تبعد إتجاهك السياسى سواء مع أو ضد عن أى حاجة ليها علاقة بالبيزنس وحاول تتعامل مع الأمور بعملية شوية وتفصل بين شغلك وتفانيك فى عملك وبين إتجاهك السياسى ...

المهم نرجع للسؤال وعايزين نفكر على برنامج باسم يوسف كمنتج .... الراجل قدم منتج مكنشى حد بيقدمه وده خلى ناس كتير تكتشف إن فيه حاجة أو ( Need ) الناس عايزاها وهى البرامج التليفزيونية الكوميدية ودى نقطة مهمة إن أحيانًا كتير الحاجة بتبقى موجودة بس مفيش حد بياخد باله منها المهم نزول البرنامج بحجم ضخم وبدعاية ضخمة عمل سوق جامد جدًا للنوع ده من البرامج ولما اختفى خللى برامج كتير جدًا تنزل علشان تسد الإحتياج ده زى ( أبوحفيظة – أبلة فاهيتا- عرض كبير- أخطر رجل فى العالم – الفرنجة ) كل دى برامج كوميدية بدأ الكتير يفكروا فيها لما اكتشفوا الحاجه اللى عند الجمهور أو اكتشفوا السوق الجديد اللى ظهر بوجود برنامج باسم يوسف ...

سؤال سريع .... هل التسويق بيوجد السوق ؟؟ لأ طبعًا عملية إيجاد السوق دى عملية صعبة جدًا ونادرة الحدوث ومبيقدرش عليها غير شركات عالمية ورأس مال ضخم لكن مهمة التسويق هى ( إكتشاف ) السوق وده بييجى نتيجة حاجات كتير أهمها على الإطلاق الإحتكاك بالعميل ومعرفة إحتياجاته وتطوير منتجات تلبى الإحتياجات دى ... وكل ما يبقى المسوق محتك أكتر بالعملاء كل ما كان قراراته صح وأنا شخصيًا بطور المنتج عن طريق قسم خدمة العملاء اللى ممكن يشرحولك إحتياجات العميل فى ثانية واحدة ....

عايزين نقرا المقال ده كويس ونبدأ نفكر إيه السوق اللى قدامى موجود بس محدش إكتشفه ؟؟؟

وربنا يوفق الجميع لتطوير منتجاتهم وإكتشاف أسواق جديدة

تسويق